Luk 1 | GAH | STEP | Ve mukilite holutegú utó i netá nenémini gakoláa ali amegesaló miliki luhuva gizinamó.

Luke 1

Luká eza imane luhuva Teopiloni gizo amimó

1 Ve mukilite holutegú utó i netá nenémini gakoláa ali amegesaló miliki luhuva gizinamó. 2 Keza nene monó liaká vete mogonalotí Izesuni netá mukí ánigi hee liake li utó iki li leme gakó luhuva gizinamó nenazo, 3 neza ámina oko ámina gakó lamaná nene legesó oko ale lamaná oko gele hee lokuke nene, Teopilo gugulizaki venemaka, geí nene ale etó etó oko luhuva imane gizo nogumumó nene 4 géisi nene gatoko avetó gakó li gememó nene gihila lamaná neve loko gilitane loko nogizuve.

Monó nagamí holokimiaká ve Zoní utó itikumú epoapoga limó

5 Zutaia mikasigú nene agulizaki ve napa Heloté gizapa oko mina zupa nene Ómasi guguni gizo ameaká ve makó minamó agulizá Zakaliá, Apiani mulusigutí. Eza Alonani agapilamokutí vená makó alimó agulizá Elisapeté. 6 Keza Ómasímini avogisaló kigika lamanaki minasike gapo lota gakó Ómasímo lo hukoko li gakó lihimáini nomimó minasike gili alikigó minasimó. 7 Elisapeté nene gohuna vená minokago, keza izegipáini nomimó minasike ozaha gelehosi milasimó.

8 Zakaliani mulusi keza monó numuni napagú Ómasi guguni gizi amita gamena alitokago, 9 guguni giziaká vete aliaká amó nenéminiki hozanini ali etó etó iki alimi nivake, Zakaliani nene Ómasi guguni gizo amezo liki alími etó ikago, monó zagusave agikagú itike anuva lamanaki netá nene Ómasi guguni gizo namigo, 10 vegená mukilite geisa agikagú minake Guivahaniloka liki minamó. 11 Nilago Guivahanímini ageló makolímo utó o amike guguni gizoaká ita lamagaloka ote minamó. 12 Oteneigo, Zakaliá ánigoake ininá ike alegesá ligimó. 13 Alegesá legekago, ageló nenémo láa loko lo amimó: Zakaliazo, geza gelegesá legemino. Guivahanímo numuna nolanimó nene mota geleneize, venaka Elisapeté nene izegipa agatupagi minoko gipa getatimó nene agulizá Zoní ave loko molozo. 14 Geza mulukagú lamaná geleko gogoliza vizinogo ane. Itó vegená mukilite gipaka utó itikumú nene laga kivisinogo ive. 15 Eza nene Guivahanímini avogisaló nene ve napa loló oko minative. Eza vain nagamí ahe itó negi nagamí ahe nonamoko moseko nominiko, izolahini agatupagú noikutí Sikalahulímo aí agikagú mino vaí itive. 16 Lá okiko Isilae vegená mukí nene gapo golesagutí kelémo atiginá okiko, Guivahani Ómasímini kovogisa i aminigave. 17 Eza Ómasímini agepagutí gakó loaká ve Ilaizá oaká imó nenéminoko amuza moloko Guivahanímini gapo veletoko aí gakó lo utó utó oko minanogo ive. Lá oko minoko olotiva vegenalitini itó izegipa komatini kigika ale apizeketative. Lá okiko gakó gili ahuliaká vegená nenete kigika lamanaki vete nigele monó nene kagata gámemé iki gilinigave. Itó eza ámina hoza alekiko, vegená mukí keza Guivahanimú ageva iki minanigave.

18 Ageló nenémo láa loko lokago, Zakaliá eza anotó aleko láa loko lo amimó: Venánegi leza ozaha gelehosima nousinazo, nenemú geí gakó gulugo gihiláa loló amive. 19 Loko lokago, agelómámo láa loko lo amimó: Gelenape. Neza nugulizáne Gapelienama noluve. Neza Ómasímini avogisaló minoko aleko oaká noumóma neve. Áisi nimiselekago lumuke gakó lamaná imane lo nogumuve. 20 Nenemú gelezo. Gakó lo nogumumó nene gele alévolé amanimómámini lihima nene gakó lamoko negi hizeko minoloko novako, minoko gakó lo nogumumó nene gihila ziti gamena nene gakó goha linogo ane. Neza nolu gakó nene hetagá aminogo ive.

21 Loko lokago, Zakaliá eza monó numuni napagú gamena hána minokago, vegená keza ageva iki minake minake gopa kagata gelemó. 22 Lá iki niago, Zakaliá alika limike gakó lo kiminogo gopa imó. Gakola gopa okago, keza nene monó zagusaveú netá haitolímini makó ánigonoitive. Liki nigelego, eza negi hizeake gakó nana oko lo kimitohe loko agizanitunú avevezaha o kimike gakó lo kememimó. 23 Lá oko noigo, hoza aliti gamena asú okago Zakaliá nene numunaloka atiginá oko vimó.

24 Alika venala Elisapeté nene izegipa agatupagi minamó. Lá oake ikani 5 oko novigo halá geko minake, 25 Guivahanímo gamena molamó nene alitokago Guivahanímo hize lé onimiake gohuna vená minukumule loko novoza hulu netá monéna ale ahulonimikave, loko limó. ^{▼▼5 1 Iki 24:10
,} ^{▼▼15 Nam 6:3
,} ^{▼▼17 Mal 4:5-6
,} ^{▼▼19 Tan 8:16, 9:21}

Izesú utó itikumú epoapoga limó

26 Lá okago, izegipalagi minatotí ikani 5-a ale ahulokago, Ómasímo ageló Gapelienima goha amiselekago Galilaia mikasiuka Nasalete numutoka vimó. 27 Neneloka izaina vená makó minamó, agulizá Maliá. Eza nene agulizaki ve napa Tevitini agapilamó zuhagutí ve makó minamó agulizá Zosehé aí ánigi milimikago minamó. 28 Noigo ageló nenémo Maliá noitoka utó oake láa loko lo amimó: Guivahanímo hize lé ogetago noanitika nenoape. Guivahanímo geitoka noive. 29 Loko agelómámo lokago, Maliá giligo gena okago, agikatunú nene gakó limómámini mogona nana oko netive. 30 Loko nogiligo, agelómámo láa loko lo amimó: Maliazo geza gehelele vizemino. Ómasímo geí ánigokago lamaná okave. 31 Gelenape. Geza izegipakagi minoko gipa getatanimó nene agulizá Izesú ave loko molozo. 32 Eza nene sipisi ve loló oko noiko Ómasímini gipalave liki linigave. Itó Guivahani Ómasímo nene avolaho Tevitini akilí ale hitomikiko minanogo ive. 33 Itó mino lúaló moloko Zakoponi agapilamó zuhaloka gizapa oko minanogo ive. Guivahani loló oko minatimó nene asú amoko gamena hána hána mino-loko voko minanogo ive. 34 Loko agelómámo lokago, Maliá láa loko lo amimó: Neza vánegi apizeko minamusive. Nenemú nolani gakó nene nana oko alévolé itive. 35 Loko lokago, ageló nenémo láa loko lo amimó: Ómasímini Sikalahulímo geí gumupiló liminogo ive, itó Guivahanímini zámuzámo hize lé ogetanogo ive. Nenemú gipa getatanimó nene etó keké vizeko noi gipa Ómasímini gipalave liki linigave. 36 Itó makó lo gimitoze, gelezo. Geí zuhagutí Elisapetéma nene gelehosimámo izegipa agatupagi noigo ikani 6 mota vokave. Eza nene gohuna venámave liki nilago izegipalagi minokave. 37 Ómasímo loló amiti netala ma nomive. Loló iti netakó nenazo, nenemú Ómasímo Elisapetenimú li gakó mota gihila zekave. 38 Loko lokago, Maliá nene neza Guivahanímini gelekelé mohó nounazo, nolani gakó nene ámináminoko utó ino. Loko lokago, ageló nenémo ahulomiake vimó. ^{▼▼27 Mat 1:18
,} ^{▼▼31 Mat 1:21
,} ^{▼▼32-33 2 Sam 7:12-16; Isa 9:7
,} ^{▼▼37 Apí 18:14}

Maliá Elisapeté noitoka vimó

39 Maliá nene mino hána amike Zutaia mikasiuka agokaloka numuni makó minatoka iteko vimó. 40 Iteko vike Zakaliani numukú itike Elisapeteni geké lotamó. 41 Geké lomikago, Elisapeteni mulunagutí izegipalama ziginí igo gilimó. Gelekago, Ómasímini Sikalahulímo nene Elisapeteni agikagú lemeko vaí okago, 42 gakó napa like láa loko lo amimó: Ómasímo eza vená mukikutí gelémo etó ike nónohá zegimikave, itó izegipa getatanimó nenegi lusa gemikave. 43 Geza není Guivahanímini izolagama noane. Vená ánéama nounazo, nanamú nenitoka okane. 44 Gelezo. Geké nolonetako, izegipa nenémo mulúnegutí agoliza novizike ziginí okago gelekuve. 45 Itó geza nene Guivahanímo lo gimi gakó vo alitive loko gele alévolé okako, Ómasímo lusa gegimikave. Nenemú gulugo lamaná okave.

Maliá agoliza vizike Ómasi agepoka limó

46 Loko lokago, Maliá láa loko limó:

Neza nigikatunú Guivahani agepoka noluve,
47 itó sikalahúnetunú Ómasi nugutó vizeaká vemú nogoliza vizuke agepoka noluve.
48 Itó gelekelé mohola neza minomo lemeko minumó
itínasa nelémoko noitive.
Ómasi alévolé ve nenémo nenitoka netá gihila ale utó okamó nenazo,
nenemú omolelé amalelé iki mini-liki itita vegenalite
nenikumú giliiki Ómasímo lusa geta venale liki linigave.
Aí agulizá etó oko neve.
50 Aí gili amita vegená nasahilí okimiaká noive.
Omolelé amalelé iki minimi ite vegená lá okimiaká noive.
51 Kezáini kugupemú gelego iteaká noi vegená nene
ezáa alévolé zámuza ale utó ike kelémo ahuloaká noive.
52 Itó kugulizaki ve kehelú okago
keí gonanalivagi holomalotí velehé limiaká niave.
Itó vegená limiki minamoláatini kugulizáini ale napa oaká noive.
53 Gohogó vegená itó gaúna hiliki nimina vegená nene
netá gihila kemekago, kagatupa igo miniaká niave.
Itó henóinigi vegená ahulokimikago
muhelé iki miniaká niave.
54 Ómasi eza gelekelé otoko minuni vegená nene hize lé olimikave.
Eza agika lamanakímove loko Isilae vegená leza lá olimikave.
55 Avotegini láa loko lo moloketamó nene
Avalahani itó agapilamó zuhagi lo mololetamómámini gihila utó oloko voko minanogo ive.
56 Loko Maliá loake, Elisapeteki minasike ikani losive makole ale ahuloake, numunaloka atiginá oko vimó. ^{▼▼47 1 Sam 2:1-10
,} ^{▼▼55 Apí 18:14}

Monó nagamí holokimiaká ve Zoní utó imó

57 Itó Elisapeté eza izegipa getati gamena alitokago, gipa getamó. 58 Getokago, vegenala zuha agivelage keza Guivahanímo muluna ze hoú lake ale utó i netakumú giliake, ezagi makó mulúikú lamaná gelemó. 59 Lá iake, gamena 8 oko vokago, gipa namunimámini agupeló Ómasímini anosa militanigi mukí vegená alegesá ake amelaho Zakaliani agulizató milanigi lamó. 60 Liki likago, izolaho géneka like Óe, agulizá Zoní ave loko molatune. 61 Loko lokago, keza láa liki li amemó: Íi, geí zuhatini kugulizá makó nenéminoko nomive. 62 Liki géneka hánaka nilake, Zakaliá nene gipalámini agulizá nanave loko molative liki kigizanitunú avevezaha ikago, 63 eza pepamú agizanitunú avevezaha okago, pepa alimi amikago, agulizá Zoní ave loko luhuva gizamó. Gizokago, giliake sigaga lamó. 64 Lá ikago, Zakaliani genezala litá oko lamaná okago, Ómasi agepoka limó. 65 Lá okago, agive lugáa keza giliake kelegesá ligimó. Lá okago, Zutaia mikasigú zopegaloka numutó namató nene ámina gakó avetó iki ligili hagili ikago, 66 vegená mukilite gakóini giliake ali kigikagú milake gipama nene napa okoko nana itive. Liki lamó nene, Guivahanímini zámuza nene ámina gipaloka nego giliake lamó neve. ^{▼▼59 Liv 12:3}

Zakaliá epoapoga li gakó

67 Itó amelaho Zakaliani nene Ómasímini Sikalahulímo agikagú minake alémo vávani igo alika utó iti netakumú epoapoga like láa loko limó:

68 Isilae ve leza Guivahanite Ómasi agepoka litune.
Eza nene vegenala zuha lelí lelémo vatí ike
netá golesagutí gologí olimikave.
69 Lugutó viziti lapusa ale oteko hizekave.
Gelekelé izegipala Tevitini agapilamó zuha lelitoka neve.
70 Ómasímini agepagutí gakó liaká ve kelémo vávani okago
epoapoga gozapá láa liki liaká amóma neve:
71 Lova vetini kigizakutí gologí oletanogo ive.
Mukahá lipiliaká nia vegutí akagá oletanogo ive.
72 Avotegini nigika hize kimitove loko lo moloketamole.
Lo múnaheake lo hukoko li gakó gele minake lá oketamole.
73 Itó avoteho Avalahani láa loko alévolé oko lo molotamole:
74 Gala vetini kigizakutí gologí oletanogo ive.
Lá okiko lelegesá legemiko gelekelé otoko minanogo une.
75 Nenemú ligika avasavagi miniko gakote minamiko
gelekelé otoko minoko hilitune, liki lamó neve.
76 Itó gipa geza Guivahanímini monó gakoláa lole ale oko aí gapo veletataninazo,
geikumú nene vozaú vémini agepagutí gakó loaká veve liki linigave.
77 Ómasímo vegenala zuha kugutó viziti gakó lo kemekako,
keza gili zagikiko, lihimáini ahuloketanogo ive.
78 Lelí Ómasile eza milumate geleaká noimó nenazo,
eza lititó nene velé okulumakutí okululuva notovoko,
79 límugusigú nouhá vegená hize hanatoletanogo ive.
Itó heleakakú nominuhá vegená hize sata oletanogo ive.
Lá onoiko nonagá lamanalímini gapova utó iko
nenegú vinogo une, loko Zakaliá limó.
80 Itó ámina gipa nene agupegi agikagi napa oko alévolé okago, mikasi gomopalaló voko noigo, hoza aliti gamena alitokago, Isilae vegenatoka utó oko minamó. ^{▼▼76 Mal 3:1
,} ^{▼▼79 Isa 9:2}